Aizawl: MNF President Zoramthanga chuan ZPM sorkarin ram leh hnam humhimna dante dahkhamah puhin, kum 2028-a sorkarna an chan leh hunah an lalet leh ngei dawn tih a sawi.
MNF chuan ram leh hnam zalenna suala nunna hlante hriatrengna ni, ‘Martar Day’ vawi 46-na chu Mizoram hmun hrang hrangah an hmang a. September ni 20-ah hman ni thin nih mah se, Pathianni a a nih avangin Thawhtanni hian ‘Martar Day’ hi hman a ni.
A hmanna pui ber MNF Hnam Run, Aizawla an hmannaah MNF President Zoramthanga chuan thangthar zelten hnam sipaite leh hnam martarte inpekna leh zalenna sualna atanga thil hlawhchhuah zawng zawng hlutna an ngaihsan zui zel chu ropui a tih thu leh thudik tak zirchiana an hriat reng a tul thu a sawi a. Mizoram Peace Accord zawmna leh hnam martarte thisen chu engtikahmah a luang thlawn ngai dawn lo va, tu pawhin hriat reng leh zahna chibai buk tlat tur a nih thu a sawi.
Sorkar lai mek leh eptu party thenkhatin MNF movement leh Mizoram Peace Accord sawi nep tum thin mah se, hnam sipaite inpekna leh martarte thisen man a dal phah ngai dawn lo tiin, inremnaa tel ve lo ten an sawi nep ve ngawt chi a nih loh thu Zoramthanga chuan a sawi bawk.
Mizoram Peace Accord-in a hlawhchhuah Article 371(G) leh ILP sawhnghehna tiderthawng thei zawnga ZPM sorkar chet duh dan leh FCAA an dahkham chu demawm a tih thu a sawi a. Pathian leh mipui zarah kum 2028-ah MNF-in sorkarna an chang leh ngei ang a, ram leh hnam humhimna tur zawng zawng te chu sawhnghehin an lalet leh vek dawn tih a sawi bawk.