Aizawl: MNF Treasurer Lalruatkima chuan kum 2028-a sorkarna chang leh tura Zoram mipui rinngam niha MNF-te insiam tha mek zela an awm thu a sawi.
Inrinni khan Ramhlun South YMA Hall-ah Aizawl North II MNF Block Special Conference buatsaih a ni a; he hun hmanpuitu Lalruatkima chuan hruaitute chu nihna chelh ringawt ni lova a taka thawktu nih a tul thu leh, Mizo nunmawi rinawmna, taimakna leh dikna chawi vul tura mawhphurhna hlen a pawimawh thu a sawi a. MNF kuthnu leh thatna te mipui hmuh theih tura pholan a, Mizo nationalism hloh lova tunlai thiamna mil zela Zoram tana pen a pawimawh thu a sawi bawk.
Sorkar mek ZPM chu dawt sawia khawsa mek a ni tiin Lalruatkima chuan a puh a, mipuiin an hmufiah zel a, kil tinah an hek mek niin a sawi a. Dawt thu nen an hotupa ber thusawi tirin, tunlai thiamna hmang sualin hna an thawk mek a. ZPM tana dawt leh dan kalha beitu leh thawktute chu MNF chuan dan hmang ngeia an hmachhawn zel dawn thu a sawi a ni.
Belhchian dawl taka politics zinkawng zawh zelin Pathian pawhin MNF te a malsawm ngei a beisei thu sawiin, MNF Treasurer chuan party hruaitute leh thalaite chu rampum huapa rorelna chang leh ngei tura thahnemngai taka thawk turin a fuih a ni.