Tourism leh horticulture department-te tangkawp buatsaih ‘Anthurium Festival 2026’ kharna hun chu Inrinni tlai khan Reiek Tourist Resort-ah hman a ni a, a hmanpuitu khuallian, Tourism Minister Lalnghinglova Hmar chuan tourism hmangin Mizoram chawi kan an tum tih a sawi.
Lalnghinglova Hmar chuan kum hnih chawlhsan a nih hnu a kalphung thar – Mizo culture, nature, leh adventure-te tar lang zawnga buatsaih thar leh a nih thu sawiin, ram dangte tana Mizoram hmel mawi tar lan a nih bakah Mizorama cheng ngeite pawh intlawhpawh tam tura inzirtirna leh tualchhung eizawnna tithangtu a nih thu a sawi bawk.
October 1, 2026-a Horticulture Minister C. Lalsawivunga’n a hawn festival neih chhung hian Ailawng leh Reiek hmunah activity hrang hrang — Ailawng tlang leh Reiek tlang trekking, Khuangchera Puk, Thawmpawnga Puk leh Ngaitei Puk Cave Expedition, cable foot bridge, Zokhua live experience, nghakuai chiah, Mizo indigenous games, rifle shooting, anthurium exhibition cum sale leh food stall te buatsaih a ni a. Mizo hnam zia leh nun dan chawi lar nan YMA branch hrang hrang leh zirna inte atangin hnam lâm leh zai entir a nih bakah zan lamah Mizo zaithiam larten concert an nei thin.
Tourism minister chuan tourist tam lehzual an lo luh nan leh Mizoram hmel mawi tak tar lan zel a nih nan Winter Festival, Hnahsin Kût, Leitlangpui Music Festival, Sakawrhmuituai Sunset, leh Tlaizawng Paradise te pawh chhenfakawm zawka kalpui zel an tum thu a sawi bawk.
Tun hnaiah Mizoramah tourist an pung zel a, chhinchhiah danin kumin January atanga August chhung ringawt pawh khan tourist 6,74,911 ngawt an lo lut tawh a ni.