Aizawl: Mizoram Journalists Association (MJA) General Headquarters hruaitute leh Mamit District MJA member-te chuan Inrinni khan Mamit MJA Press Club-ah sorkarin chanchinbumi te tana hamthatna a duan — Mizoram Journalist Welfare Society (MJWS) chungchang an zirho.
MJA Gen Hqrs Treasurer Zohmingmawia kaihhruai he hunah hian MJA President Vanlalrema Vantawl chuan damlohna leh boral nikhuaa chanchinbumi te leh an chhungte tana sorkar hamthatna awm te a sawi fiah a ni.
MJA President sawi danin, MJWS hnuaiah hian accredited journalist an boralin Rs nuai hnih leh non-accredited journalist tan Rs 1,50,000 pekchhuah a ni thin a, damlohna khirhkhan bik tuarte tan pawh Rs 2,00,000 thleng hamthatna dawn theih a ni. Amaherawhchu, MJA member-te chu sorkar atanga hamthatna hmuh ringawt duhtawk lova, sorkar leh mipui inkar palai rinawm tak nihna vawnhim reng chung leh thu rintlak, dik chauh puangchhuak turin a chah nghal bawk.
He zirhona huna MJA Gen Secretary K. Zothanpara report tar lan danin, Mizoram chhungah MJA member 190 an awm mek a, heng zinga 76 te hi Mizoram Universal Health Care Scheme (MUHCS) hnuaiah an inziak lut tawh a ni.