Aizawl: Dan lova family pension la pe kir mi 674 awmin la pe ve lote lakah FIR thehluh thlengin hma lak tum a ni.
Mizoram sorkarin hremna awm lova dan lova family pension pekir tura hun a hawn (voluntary surrender) September 30, 2026-a tawp thleng khan Mizoram pumah mi 674 chuan an Pension Payment Order (PPO) an pe kir a. Pe kirte hi treasury-a pe kir mi 563 leh bank-a pekir mi 111 an ni a; district hrang hrang atang pawhin pekir hi an awm chho nual a ni.
Sorkar hriattirna leh hun tiam chhung a ral tak avangin, tun atang chuan pe kir ve duh lo leh dan lova pension la chhunzawmte man chhuak turin task force-te an thawk chhuak dawn a ni.
Task Force-te hian dan lova pension la chhunzawmte zawng chhuak turin YMA leh tlawmngai pawl dangte an thawhpui dawn a, tualchhung mipui pawh heng thil dik lo hretute chu Treasury Office-a hriattir tura ngen an ni.
PPO pekir hun hawn chhungin Treasury office-ah te complaint box hung a ni a; hriattirna chhuah hnu pawha PPO pekir duh lova Task Force-ten an man chhuahte lakah ‘Show Cause Notice’ pek an ni ang a, chumi hnuah a tul dan azirin Police Station-ah thubuai (FIR) thehluh thlenga hma lak zui zel a ni dawn a ni.