Aizawl: Mizoram Language Development Board (MLDB)-in Indian Constitution 8th Schedule-a Mizo tawng telh a nih theih nana hma an la chu chu him tawk lo leh dik tawk lo nia hriain Joint Hnampual Students’ Organisation (JHSO) chuan an thlawp loh thu an sawi.
Hnampual zirlai pawl pasarih — Hmar Students’ Association, Lai Students’ Association, Mizoram Bawm Students’ Association, Mara Students’ Organisation, Pang Zirlai Pawl, Ranglong Students’ Union leh Siamsinpawlpi intelkhawm hruaitute thukhawm chuan MLDB hmalakna hi ngaihtuah nawn leha zirchian leh ngei nise an ti.
JHSO hruaitute sawi danin nikum November 25-a MLDB leh hnampual zirlai pawlte an thutkhawm tumin 8th Schedule-a Mizo tawng telh hi an thlawp rih loh thu fiah takin sawi tawh mah se, media lamin an thlawp anga thu dik lo an thehdarh hman bakah assembly house-ah hial Education Minister Dr. Vanlalthlana thu dik tawk lo an sawitir ta chu tha an ti lo hle a. Hun rei tak hmalakna a chawlhsan hnua Ningani-a MLDB chairman leh secretary-ten larsap hmua hma an la lehte chu thil lawmawm lo tak nia sawiin, he issue-ah hian JHSO chu an dinna ngaiah an ding tlat dawn tih an sawi.
JHSO hian hnam pual zirlai pawl hrang hrang pasarih hruaitute chuan an thil phut leh an ngaihdante hi a tul dan ang zelin larsap leh sorkar laipui thuneitute hnen thleng pawha zualko zel an tum thu an sawi bawk.