Lunglei district chhunga Mautlang khuaa Upper Primary School (UPS) leh Lower Primary School (LPS) (SSA) sikul zirtirtute an sikul post-a an kal ngai loh avangin VC, All NGO, leh tua lchhung nu leh pate chuan Zirtawpni khan lungawi lohna an lantir.
Khawtlang hruaitute chuan he sikul pahnih a zirna puitlin pui tura zirtirtute awm mumal lo lutuk hian zirlai naupangte leh chhungkuate harsatna a thlen mek thu sawiin, sorkar hnenah zirtirtu regular leh zirtirtu indaihna phuhru ngei tura hma lakna chak tak an phut tih thuchhuah an siam.
Mautlang khuaah hian sorkar-in sikul building tha tak a sak sak tawh mah se, kum eng emaw chen kal ta atang khan zirtirtuten sikul an kal zui lo reng a. Khawtlang hruaituten sikul kal tura vawi duai lo an nawr hnuah pawh kum tir admission tih hunah chauh ni khat an inlan hnu a, a bak zawng chu hmuh chhunzawm tur an awm ngai lo niin an sawi.
He harsatna avang hian Mautlang khaw chhung nu leh pate chuan zirna changtlung zawk dawng tura an fate chu khaw thenawm Zehtet-a Nursery atanga kal tir an ngai thin a, an eizawnnaah harsatna lian tak an tawh phah mek tih sawiin, khawtlang hruaitute leh naupang nu leh pate chuan he lungawilohna lantirna atanga sorkar hnenan Mautlang UPS leh LPS zirtirtute mahni post-a regular taka an awm nan sorkarin hma a laksak tur leh, mahni post-a kal thei tur zirtirtu thar ngaihtuah sak a, zirtirtu indaih lohna nasa tak hi phuhhruk sak ngei turin an phut tih an tar lang.
Mautlang VC leh All NGO-te chuan he an thil phut hi sorkar lamin an hlawhtlinsak lo a nih chuan, khawtlang pumpui a nasa zawka lungawilohna lantir leh an tum thu an tar lang bawk.