Aizawl: BJP Mizoram chuan Inrinni khan State Office, Mipui Run, Upper Republic-ah State Prabhari (Incharge) thar Dr. Bhagwat Karad, Union Finance Minister hlui ni bawk lawmna inkhawm an hmang. Dr. Bhagwat Karad chuan BJP Mizoram-te tihchak a, chhunglam leh pawn lama harsatna awmte chinfel pui tura lo kal a nih thu sawiin, kum 2028 Mizoram assembly election-a BJP-in sorkarna an chan ngei theih nan theih tawp an chhuah dawn tih a sawi.
Lawmna inkhawm State General Secretary Delson Notlia kaihhruaiah hian Dr. Bhagwat Karad chuan, Prime Minister Narendra Modi-a’n hmar chhak leh Aspirational district te ngaihsak tura a tih angin Mizoram chu Union Finance Minister a nih lai pawhin a lo tlawh tawh thu a sawi a. BJP chu chhungkua pakhat an nih avangin central atanga state leh tualchhung thlenga harsatna awm te chu chin felsak zel an tum thu sawiin, sorkarna siam an duh chhan ber pawh mipui harsatna sutkian leh hmun ngeia kalchilha chhanchhuah hi a ni tih a sawi a, chanvo hrang hrang neitute pawh thahnemngai taka hma la theuh turin a chah a ni.
Inkhawmah hian State President Dr. K. Beichhua, MLA, state hruaitu hrang hrang te bakah Siaha District President M. Laikaw, CEM te, leh CADC President DD Chakma te an tel a, State General Secretary Lalfakzuala Hauzel-in lawmthu sawiin inkhawm a tihtawp hnuah, ‘Seva Sankalp Abhiyan’ pualin TNT hmunah mi dang tana luanchhuahna hun leh thilpek hlanna hun an hmang chhunzawm bawk.