Aizawl: Mizoram medical science chanchina chhinchhiah tlak tak thil thar thlengin, Civil Hospital, Aizawlah a vawi khatna atan lungphu enkawlna khawl thar ber chi ‘Abbott AVEIR VR Leadless Pacemaker’ chu kum 67-a ula pensioner pakhat hnenah hlawhtling takin vuah a ni.
He hmasawnna pawimawh tak hi Civil Hospital Aizawl Cardiology Department-a Dr. Loncy V. Lalzarliana leh Dr. Isak Lallawmkima leh an thawhpuite hlawhtling takin an dah a, Apollo Multi Speciality Hospital, Kolkata-a Dr. Uday Shankar Das-a endikna hnuaiah leh Abbott Company aiawh Cardiac Rhythm Management team-te support-na nen Mizoram Universal Health Care Scheme (MUHCS) hmanga tihlawhtling a ni.
Pacemaker pangngai ang lova awm zai hawn leh vun hnuaia khawl dahna siam ngai lo, thisen zam kaltlanga hrui (lead) thlung bawk si lova kap (femoral) atanga catheter hmanga lung chhunga dah luh mai a nih avangin damlo tan pawh a hautak lo va, he hmalakna hian Civil Hospital Aizawl-ah lung lam enkawlna sang zawk a awm tawh a ni tih lantirin, ram chhunga meditech hmasawnna kawngah bung thar a kaitir a ni.