Electoral roll ennawn kaihhnawihah thalaite leh eptu party thlawptute chuan Election Commission of India (ECI) chief bân phutna lian tak an lantir chhunzawm a, police pawhin man an nei nual.
Mumbai khawpuiah chuan eptu hruaitu, Raj Thackeray-a leh Uddhav Thackeray-a te kaihhruaiin CEC chief Gyanesh Kumar-a bân phutna punkhawm hi huaihawt a ni.
Lungawi lote hian ECI chuan Prime Minister Narendra Modi-a kaihhruai rorel lai, BJP tana hlawk turin thil a ti niin an puh a, anni chuan an pha ve ve thung.
Khawpui ber, New Delhi-ah chuan Pathianni tlai thim dawn atanga pung khawmin police-ten mi eng emaw zat an man niin sawi a ni.
A tel zinga thenkhat chuan police-in an dalna an paltlang a, an mi mante an ahna lirthei an hual a, a then kawng danna atana an tihah an lawn liam bawk.
An zinga thenkhat chuan police hian tharum an hmang nasa niin an sawi a, Delhi Police erawh chuan engmah sawi an la nei lo.
Khawpuia police-te hian a hma ni hnih atang khan pun khawm tur hi an lo dang tawh a, mi tam tak manin hmun dangah bus-in an lo phur sawn tawh a. An man thenkhat chu Zirtawpni leh Inrinni khan chhuah an ni a, pun khawm khapna an palzut avangin thubuai erawh an siamsak.
Lungawi lote hian nikum atanga electoral roll ennawn, special intensive revision (SIR) kalpui hmangin mi maktaduai tel hming paih niin hei hi Modi-a party-in an hlawkpui theih tura tih a ni tih an sawi.
“Rorel laite hi hetiang taka thuneihna chan nana an insawh ngheh danah kan thinrim a ni tih ka hrilh duh a. Mipuiten tunge thuneitu tur leh eptu tur chu an chin fel tur a ni a, election commission-in a lo chin fel tur a ni lo,” tiin Raj Thackeray-a chuan a sawi.
ECI chuan SIR hi hming awm nawn, thi tawh, vote nei thei lo nei si paiha roll dik zawk a awm theih nana ti an ni tih a sawi a. Zirtawpni khan tel thei si tel lote ziah luh theih hun hawn a ni bawk.
Kumar-a chuan bâng tura nawrna hi a la chhang lo va, amah duh lohna hi la lantir chhunzawm zel a nih hmel.
Eptu tangrualte chuan Thawhlehni hian ‘save democracy’ tiin ECI pisa panin kawng zawh an tum a. Gen Z Cockroach Janta Party (CJP) pawhin Inrinni hian Delhi-ah kawng zawh lian huaihawt an tum bawk.
Modi-a sorkarin hetiang taka an laka lungawi lohna hi kum 12 thuneihna a chan tawh chhunga a la lian ber pakhat a ni.
July khan medical college entrance examination-a zawhna put ru avanga zirlaite nawrnain education minister a lo bâng tawh a, Modi-a’n a term thumna a hman mekah politic-a hun khirh a tawn lai ber a tling.