Moscow-in Ukraine khawpuia thil pawimawh beih chhunzawm zelin ni li a zawnin drone hmangin Kyiv-a lei pawimawhte an bei ta.
A zawna ni hnih nana Pathianni tuka Pivnichnyi (Northern) Bridge an beihnaah mi pahnih an hliam a, Pivdennyi (Southern) Bridge chu kar hmasa khan vawi eng emaw zat an lo bei tawh bawk.
German Chancellor Friedrich Merz-a’n Russia-in thapuia a beih mek laiin Kyiv a thlawpzsia lantir nana Kyiv a tlawh mek laiin a bei a ni.
Russia-a sipaite chuan Kyiv leh Ukrainian region dangte an beih chhunzawm zel dawn tih an sawi a. A hmain lei pahnihte hi Ukrainian sipaiten veivah nan an hmang niin a sawi bawk.
Pathianni tuka beihna thleng video darhah chuan drone-in Pivnichnyi Bridge a fuh hma lawk thlengin lirthei a la tlan a, a fuh hian a puak a, a kang alh nasa hle a. Video leh thlalak dangah chuan a lei kawngpui laia kua pawh a lang.
Kyiv Mayor Vitali Klitschko-a chuan mi pahnihin hliam an tuar tih a sawi.
Kyiv-ah hian Dnipro River lui chungah khawthlang (ding lam) leh khawchhak (vei lam) inpawh nan lei pariat a awm a, heng lei hi mi maktaduai thum velin lirthei, rel leh metro-a inkalpawh nan an hmang a. Ni tin lirthei 500,000 velin a zawh thin.
Lei beih pahnihte hi a la ding a, a chhia a awm nual avangin zawh khuahkhirh niin hmun thenkhatah inkalpawhna a khaihlak phah.
A zawhtu tam ber hian kar laihawlah an zawh a, a siamtuten siam that tuma bei nghalin thuneitute chuan pontoon bridge, lawng leh tui hnuaia lei verh hmanga inkalpawh dan an dap.
Klitschko-a chuan Russian drone-in an tui lum siamna hmun a fuh bawk a, hmarchhaka Desnyanskyi district-ah tui lum an harsat phah tih a sawi.
Ukrainian President Volodymyr Zelenksy-a chuan Pathianni tuk khan hmarchhakah Sumy region-a kudam beihnaah mi pakhat a thi tih a sawi a. Ram lailia Dnipro khawpuia inbiakpawhna hmunpui beihnaah mi parukin hliam an tuar bawk niin a sawi.
Ukraine-a Air Force chuan Inrinni zan leh Pathianni khaw var thleng khan Russia hian jet hmang 52 nen drone 135 an thlawhtir a, heng zinga 125 chu an lo kap thla niin an insawi.
Beihna nasa tak an tawh lai hian Germany Chancellor Merz-a chuan Kyiv-ah Zelenksy-a hmuin indonaa Ukrainian sipai thite zahna pangpar an dah dun.
Merz-a chuan an ram chuan Ukraine an pui zel dawn tih a sawi a, “Ukraine hian chawlhkar khirh tak an tawk mek a, vawiina Kyiv ka tlawh chhan chu – ‘min rinchhan thei ang’ tih hi a ni,” tiin X-ah a tar lang.
Zelensky-a chuan a hnuah Germany hian puihna € tluklehdingawn 1.3 a pek tur thu a puang zui a. “Hengte hi ralthuama min puih nghalna tur a ni a, thlasik lo thleng turah kan energy siamna tihthatnaah pawh min pui ang,” a ti.
May, 2025-a Merz-a hi chancellor a nih atang khan Germany hi ram mala Ukraine puitu lian ber a ni.