Mizoram sorkar chuan 2026 Asian Games hmeichhe hockey-a gold medalist pahnih, Kolasib nula, Lalremsiami Hmar leh Kanghmun South nula, Lalthantluangi te hnenah Rs. nuai 40 ve ve a pe dawn.
Asian Games-a hlawhtlinna changtu, Lalremsiami Hmar leh Lalthantluangi te lawmpuina pual inkhawm chu Thawhtanni khan Mualpuia R. Dengthuama Indoor Stadium-ah buatsaih a ni a. He hunah hian Chief Minister Lalduhoma chuan hmeichhe pahnihte hlawhtlinna chu ram leh hnam chhuanawm a nih thu sawiin, Mizoram State Incentive Cash Award atangin Rs. nuai 25 ve ve leh Bana Kaih Scheme atangin Rs. nuai 15 ve ve, a vaiin Rs. nuai 40 ve ve pek an nih dawn thu a puang.
Chief minister chuan state lian leh hausa zawkte pek zat pe ve thei lo mah se sorkar phak tawkah an hlawhtlinna a hlutzia an lantir tih a sawi a. Asian Games-a Mizoram atanga gold medal la hmasa ber an nih bakah 2028 Los Angeles Olympics-a tel tura India tlinpui zui a nih avangin an hlawhtlinna chu a hlu lehzual tih a sawi bawk.
Chief minister chuan Lalremsiami Hmar chu India infiamna huanga chawimawina sang, Arjuna Award dawng tura thlan a nih bakah final-a goal awm chhun khungtu leh hlawhtlinna tam tak latu a nih avangin a hming chawia hockey ground siam an tum thu leh Kolasib Diakkawn GSA Playground chu hetiang atan hian ruahman a nih thu a sawi.
Sports Minister Lalnghinglova Hmar pawhin Mizoramah hockey chu a thih loh nan leh chawi nun leh a nih theih nan khelmualte siam zel an tum thu leh, khelmual pe thei an awm chuan lawm taka an pawm tur thu a sawi bawk a ni.