Aizawl: BJP Mizoram in-charge Dr. Bhagwat Karad-a chuan ZPM party-in NDA zawm chungchangah official-a sawi ho a la nih loh thu a sawi a. Kum 2028-a MLA inthlanpui lo awm turah an ngaih thu tak thu a sawi.
BJP Mizoram in-charge Dr. Bhagwat KaradKarad, union finance state minister hlui ni bawk leh BJP Northeast Co-Coordinator Rajiv Babbar te chuan Thawhtanni khan Upper Republic, Aizawl-a BJP Mizoram State office-ah thu thar thehdarhtute an kawm a. Prime Minister Narendra Modi-a kaihhruaina hnuaiah sorkar laipuiin Rs vbc 9,000 aia tam hmanga hmasawnna hna hrang hrang a thawhte avangin Mizoram dinhmun a inthlakdanglam mek tih an sawi.
Central BJP leadership-in Mizoram assembly inthlan lo awm tur chu uluk taka an ngaihtuah thu leh an ngaih thu tak thu sawiin, Dr. Bhagwat Karad-a chu Mizoram BJP in-charge atan leh Babbar chu NE Co-Coordinator atan ruat an nih angin grassroots level thlengin party tihchak zui nan Mizoram an tlawh zing dawn thu an sawi.
Dr Bhagwat Karad-a chuan PM Narendra Modi vision, ‘Viksit Northeast’ leh ‘Act East, Act Fast & Act for the Northeast’ tihpuitlin nan Mizorama hmasawnna leh rorelna dik thlen chu BJP thil tum ber a nih thu leh he hmasawnna thuchah hi mipui hnena thlen a nih theih nan media te thawhpui a ngen.
Sorkar laipui hmalakna hrang hrang zingah Rs vbc 8,070 vel hmanga Bairabi-Sairang rail line zawh a ni ta chu Mizoram khawpui rel kawnga zawm anih thu leh Sairang atangin Delhi, Guwahati leh Kolkata panna direct train a awm tawh thu an sawi a. Hei bakah hian Rs vbc 500 senna tur Aizawl Bypass kawng leh national highway hrang hrang zauh hnate, Kaladan Multimodal Transit Project, Mualkhang LPG Bottling Plant, Eklavya Model Residential School leh PMAY-G in sakna scheme-te chuan Mizoram inthlakdanglamna a thlen tir melk zel tih a sawi bawk.
Dr Bhagwat Karad-a chuan ruling ZPM party-in NDA zawm chungchang zawhna chhangin official-a sawi ho a la nih loh thu leh ZPM emaw, MNF emaw, chungchang pawh central leadership thutlukna kut a nih thu a sawi a. Mizoram chu state te tak te a nih avangin party dik tak thlan chhuah a nih chuan hmarchhak chhunga hmasawn ber leh India pum pui entawntlak a ni thei tiin, BJP hian Mizoram hmakhua atan thil tam tak a ti thei a ni tiin a sawi bawk.