Mizo National Front (MNF) Legal Board chuan MNF President Zoramthanga thusawi anga lang, video dik lo leh siamchawp (forged/false electronic record) social media-a thehdarhtu leh a siamtu chhui chhuaha hrem an nih ngeina turin Thawhtanni khan Cyber Crime Police Station, Aizawlah FIR an theh lut.
MNF Legal Board Vice Chairman Lalpianfela Chawngthu hovin FIR theh luh a ni a. Legal Board Secretary David R. Lalsawmtluanga hmingin he FIR hi BNSS Sec. 173 hnuaiah thehluh a ni a, BNS Sec. 336(4) bawhchhiatna lian tak a tling niin an tar lang.
FIR-a a lan danin, social media platform hrang hrang — Facebook, WhatsApp, YouTube leh Instagram-ah te MNF President Zoramthanga’n, “MNF hi Pathian leh mipuite zarah kan sorkar hunah, mipui retheite nuai nga atanga nuai 15 inkar kum tin pawisa kan pe dawn,” ti anga a sawi loh pui siamchawpa thehdarh a ni a, he video viral-ah hian caption atan thu ziak dah tel a awm bawk a, chungte chu ‘MNF mi leh sa mi tlem te hnenah cheng nuai thum aiah vaimim an lo sem tawh a.!’, ‘Tunah nuaih 15 an tiam leh ta, nuaih 15 aiah Chakai a ni leh mai a…’ tihte leh ‘Maurawkela te ho tak zet hi chu aw.!’ tih a ni, an ti.
MNF Legal Board chuan he video dik lo leh siamchawp thehdarhtu langsar zual tar langin, ZPM Party Media & Publicity Department Chairman B. Lalchhanzova leh Facebook user Lalbuaia Vanchhawng leh Marini Zpm te hming an ziah lut a ni.
Hetianga mi zahawm leh ram hruaitu lo ni tawh hming tihliau zawnga thil sual ti tute hi thleibik awm hauh lova chhui chhuak a, dan ang thlapa hremna lek a nih ngei nan police-te chu hma la turin an ngen a ni.