Aizawl: Mizoram chhung district hrang hranga damdawi in endiktu tur, health department hnuaia thawktu thlanchhuahte tana buatsaih ni thum awh tur ‘NQAS Internal Assessor Training (IAT)’ chu Thawhlehni khan Conference Hall, DHME, MINECO-ah tan a ni a; National Health Mission (NHM) Mission Director Dr. R. Lalchhuanawma chuan a hmanpui a. Training hi October 8, 2026 thleng a awh dawn a ni.
Training hawngtu Dr. Vanlalrengpuia, State Nodal Officer (Quality Assurance), NHM chuan district tina active assessor awmzat an inan tlan theih nan leh district chhunga healthcare facility zawng zawng ten 100% NQAS certification an hmuh ngei beiseiin district hotuten thawktu an thlan chhuahte koh an nih thu a sawi.
NHM Mission Director Dr. R. Lalchhuanawma pawhin Mizoram damdawi inte quality tha zawka a awm tlan theihna tura thawktute inpekna chhuanawm a ti a, kum 2014-a he programme huphurhawm tak bultan a nih hnuah kum 2017-ah Mizoram district hospital chu India rama certified hmasa ber dawttu a lo nih tawh thu a sawi.
Dr. R Lalchhuanawma chuan damlo enkawlnaah an lawmna tling leh damdawi ina lawm taka an kal nawn leh theihna tura theihtawp chhuah a pawimawh hle tih a sawi a. Khawtlang leh mipui dawrnaah pawh mi hriatna lo neih tawh sa te hnualsuat lo a, tawngkam dam leh zaidawh chunga dawr thiam turin trainee-te a chah bawk.
Ni thum chhung he training-ah hian Dr. Ajay Kumar Arya (Consultant, QPS, RRC-NE), Dr. Lalchhuansanga Pachuau (State Consultant, QA), leh Dr. KT. Lalrammawia (State Consultant, PH, NHM) ten zirtirna an pe dawn a ni.