Mizoram Journalists Association (MJA) General Headquarters chuan Thawhlehni khan Aizawl Press Club-ah Information & Public Relations (I&PR) Director kalchhuak K. Vanlalsangi thlahna leh Director thar Mina Zoliani Joute lawmpuina inkhawm an buatsaih.
Inkhawm hi MJA Vice President C. Lalhmachhuana’n a kaihruai a, MJA President Vanlalrema Vantawl-in director kalchhuak leh director thar te hnenah thlahna leh lawmpuina thuziak a hlan.
Inkhawmah hian I&PR Director kalchhuak K. Vanlalsangi chuan department-a a thawh chhunga MJA nen thawh hona tha tak an nei thin chu lawmawm a tih thu sawiin, Pathian kaihhruainaa pension thlenga hna a thawk thei chu lawmthu a sawi a; MJA member-te pawh thuthar thehdarh kawnga ram rawng an bawlnaah theihtawp chhuah zel turin duhsakna a hlan a ni.
I&PR Director thar Mina Zoliani Joute pawhin MJA-in director kalchhuak thlahna leh director thar lawmpuina an buatsaih thin chu hlu a tih thu sawiin, I&PR leh MJA te thawh hona lo awm tawh sa chu chhawm nun zel a duh thu a sawi a. Pathian rawn chunga an hma a mawhphurhna te tluang taka hlenchhuah a nih theih nan theihtawp chhuah turin a sawm.
MJA President Vanlalrema Vantawl pawhin director kalchhuak K. Vanlalsangi’n MJA te tana theihtawp a lo chhuah thinnaah lawmthu a sawi a, Director thar Mina Zoliani Joute pawh mawhphurhna thar tha taka hlen turin duhsakna a hlan bawk.
MJA President chuan journalism-in hma a sawn chuan Mizoramin hma a sawn dawn tihna a nih avangin tunah pawh insiamthat runpui an kalpui mek thu leh member-te pawhin theihtawp an chhuah zel a tul thu a sawi a ni.