Aizawl: Mizoram sorkar leh Mizoram Synod-te inremna (MoU) angin, ruihhlo ngaite enkawlna hmun, Jordan Centre, Sethawn chu Thawhlehni chawhnu khan hawnna leh Pathian hnena hlanna inkhawm neih a ni.
Health & Social Welfare Minister Lalrinpuii’n khuallian nia hmanpuiin, Mizoram Synod Moderator Rev. John Raldosanga’n Pathian hnenah a hlan. Centre hi kum 15 chhung atan Synod-in a enkawl dawn a, awm man hi thla khatah Rs 3,000 niin, a pe thei lote tan Synod-in an tumsak vek dawn a ni.
Jordan Centre enkawlna hi thuang hnih a kal pui tur a ni a; De-addiction section-ah mi 70–80 leh After care (skill training) section-ah mi 150 bawr enkawl theih tura ruahman a ni.
Admission hi October 7, 2026 atanga hawn niin, October 20, 2026 atangin lak luh tan a ni ang.
Rev. Dr. K. Lallawmzuala chu Managing Committee Chairman leh Rev. Lalrinmawia chu Director atan ruat an ni a; thawktute chenna quarters, generator, Jio internet leh CCTV te peih fel a ni tawh bawk.
Social welfare minister chuan sorkar mai bakah kohhran hmangaihna nena enkawlna a pawimawh thu leh Synod-in he centre an enkawl thei chu a lawmawm takzet tih a sawi a. Golden Triangle rama tel Myanmar nen km 500 chuang ramri intawm avangin ruihhlo tawlh a hluar hle tih sawiin, sorkar pawhin theih tawp a chhuah thu a sawi a. Mizoramah ruihhlo a hluar avangin supply reduction mai ni lova demand reduction kalpui a nih thu sawiin, pharmacy licence nei dan dik lo leh ruihhlo zuartute licence cancel a nih tur thu a sawi.
Synod Moderator Rev. John Raldosanga pawhin sorkarin Synod a ring tawk a, he rawngbawlna pawimawh tak an kuta a hlan chu lawmthu sawiin, Pathian rinchhan chungin theih tawp an chhuah dawn tih a sawi.
Jordan Centre hi Synod enkawl rescue home pathumna a nih bakah, Mizorama home hrang hrangte tanpuina atan Synod hian Rs nuai 80 a pe chhuah tawh a ni.