Autonomous district council pathum — Mara Autonomous District Council (MADC), Lai Autonomous District Council (LADC) leh Chakma Autonomous District Council (CADC) — Chief Executive Member (CEM) te chuan Nilaini khan Aizawl Press Club-ah thuthar thehdarhtute kawmin ZPM sorkar hnuaia ADC thawktute hlawh pek dan chungchangah leh Revise Estimate (RE) pek an nih loh avanga sum harsatna lian tak an hmachhawn mek chungchangah an lungawi loh thu an sawi.
He hunah hian MADC CEM M. Laikaw (Convener), LADC CEM C. Lalsawmzuala, CADC CEM Nirupam Chakma leh CADC Chairman Kali Kumar Tongchangya ten thu thar thehdarhtute an hmachhawn a. An sawi danin, sorkar hmasate hnuaiah kha chuan State Finance Commission (SFC) remtihna awm kher lo pawhin DA, Annual Increment, promotion leh regularization te thlengin sum indaihlohna chu RE kaltlangin pek thin an ni a. Mahse, ZPM sorkar hnuaiah 2022-23 financial year hnuah RE pek an ni ta lo va, hei vang hian tunah hian thawktu hlawh chu MADC-ah Rs nuai 2,588.30, LADC-ah Rs nuai 6,992.75 leh CADC-ah Rs nuai 6,377.79 an bat phah ta a ni.
District council chu kum 54 kalpui a ni tawh a, tun anga buaina an la neih ngai loh thu sawiin, chief minister-in budget atanga hlawha zaa 90 chuang hman thin zaa 60-a tihniam tura a tih chu thawktu hlawh pung zel leh budget tihpun a nih miau si loh avangin thil theih loh a ni tiin an sawi a. Officer lak uar anga sawi thin pawh thu belhchian dawl lo a ni tiin, larsap leh District Council & Minority Affairs Department kaltlang lovin tumah an lak ngawt theih loh bakah kum 2010 atang khan officer thar lak an nei tawh lo tih an sawi bawk.
MADC CEM M. Laikaw chuan Siaha-a Union Finance Minister Nirmala Sitharaman an hmuhnaa SASCI kaltlanga central tanpuina tur an dilna chungchang pawh sawiin, chief minister-in rem a tih loh avanga buaina an neih dante an sawi a. CEM-te hian an harsatna leh chanvo dik tak sutkian sak tur hian chief minister leh larsapah ziakin an thlen tawh thu leh tihhlawhtlin ngei an beisei thu an sawi a. Council hruaitute chuan sorkar laka an phutte a hlawhtling lo a nih chuan an hmalak dan tur rel that leh an tum thu an sawi bawk a ni.