Aizawl: Centre leh state sorkarte thawhhona hnuaia Vikshit Bharat 2047 hlawhtlinna tura hmeichhia leh naupangte humhalh leh dawmkan dante sawiho tura buatsaih, ni hnih chhung awh tur Departmental Summit on Women & Child Development chu Ningani khan Sushma Swaraj Bhavan, New Delhi-ah tan a ni a. Sorkar laipui Ministry of Women & Child Development Department buatsaih he summit-ah hian WCD Minister Lalrinpuii a tel.
He summit-ah hian Lalrinpuii chuan state hrang hrang atanga WCD Minister leh Senior Official-te hmaah Mizoram sorkar hnuaia WCD department hmalakna tha bik hrang hrang sawiin, Mission Vatsalya hnuaia portal leh digital case management chungchangah presentation a pe a. Naupang venhim ngaite chungchangah portal awm tak avanga chak leh tha zawka hmalak dan te, pending case neilo tura hma lak dan te, community participation tha zawk leh Child Helpline, CPIMMS Portal bakah Digital UNCRC leh legal rights dissemination hmalakna te a tar lang.
He hunah hian Union Minister for Women & Child Development Annpurna Devi, Union Minister of State Savitri Thakur, Delhi Chief Minister Rekha Gupta bakah state hrang hranga WCD Minister leh Senior Official-te an tel a. Ni hnih chhung sawihona hrang hrang neih a nih hnuah vawiin tlaiah he summit kharna hun hi Prime Minister Narendra Modi hoin neih a ni ang.