Union Minister for Development of North Eastern Region (DoNER) Jyotiraditya M. Scindia chuan Thawhtanni khan Tuivamit Tlangah Aizawl Institute of Arts & Music for the North Eastern Region (NER) a hawng a; hemi rual hian Ministry of DoNER hnuaia hmasawnna project pakua lungphum online-in a phum bawk.
Hawnna inkhawmah union minister chuan kum hnih leh a chanve chhunga hmarchhak a tlawh vawi 35-na a nih tawh thu sawiin, India hmasawnna leh Vikshit Bharat 2047 thlen turah hmarchhak state-te chuan chanvo pawimawh tak an neih thu a sawi a. Mizoram chu a hmun mawina bakah rimawi tum thiam an tam chu ro hlu a nih thu a sawi bawk.
DoNER hnuaiah Mizoramah project 375 vel kalpui mek a ni a, za zela 75 chu zawh tawh niin hna an thawh that thu a fak a; hmasawnna hrang hrangte hi mipuite chu tangkai taka hmang a, Mizoram tihhmingthat nan hmang turin a chah.
Chief Minister Lalduhoma pawhin thu sawiin Scindia thawh rah zarah Mizoram leh hmarchhakin hmasawnna tam tak a hmuh tak avangin lawmthu a hrilh a; project hrang hrang lungphumte hian mipui tana hmasawnna leh malsawmna a thlen ngei a rin thu a sawi bawk.
He hun hi Chief Secretary Khilli Ram Meena-a’n a kairuai a, DoNER Secretary Katikithala Srinivas bakah PWD Minister Vanlalhlana, Art & Culture Minister C. Lalsawivunga leh Adviser to Chief Minister TBC Lalvenchhunga te an tel a ni.
- Daido Vangkawt Road leh Pukzing to Silsuri Road leh Tualpui to Champhai Road tihthat leh sak thar hna (NESIDS – Roads).
- Kolasib, Mamit, Lunglei leh Lawngtlai District-a Oil Palm Link Road tihhmasawn hna.
- 132 kV S/C line from Bairabi to West Phaileng via Mamit (NEC).
- North Vanlaiphai Water Supply Scheme tihlen belhna.
- MINECO-ah AYUSH Development Centre sak hna.
- Zemabawka ANM School tana 40 Bedded Hostel sak hna.
- Mizoram chhunga Sports Infrastructure Development hna