Aizawl: Stanford University (USA) leh Elsevier-ten khawvel pum huapa zirchianna (research) lama kutchhuak tha leh tangkai chhinchhiaha an thlanchhuah ‘World’s Top 2% Scientists 2026’ list-ah Mizo mi thiam pahnih, Dr. Lalduhsanga Pachuau leh Dr. Samuel Lalthazuala Rokhum-te an tel.
Assam University, Silchar-a thawk, Dr. Lalduhsanga Pachuau hi damdawi kaihhnawih (Pharmaceutical Sciences) zirchiannaa a hmalakna leh a thawhhlawkna avangin he chawimawina list-ah hian a hming a lang thar a. NIT Silchar-a thawktu Dr. Samuel Lalthazuala Rokhum pawh Energy leh Strategic Technologies zirchianna lamah a thawhhlawk avangin thlanchhuah zingah hian a tel a ni.
Stanford University leh Elsevier-ten he list an siam thin hi zirchianna (research paper) chhuah tam zawng ringawt thlira siam lovin an kutchhuakten khawvel zirna leh mihringte tana awmzia an neih thuk dan te, hmasawnna leh tangkaipui an nih dante tehkhawnga hmanga uluk taka siam thin a ni.