Central YMA chuan ambulance atana an hman lai, Mahindra Supro (MZ 01 Z 2369) chu Cachar biala Mizo mipuite mamawh phuhrukna atan Silchar Branch YMA hnenah Nilaini khan a hlan.
Ambulance hlanna hi Tuikhuahtlanga Central YMA Hall-ah hman a ni a, Central YMA President R. Lalngheta’n a kaihruai a, Er. H. Duhkima, Treasurer, Central YMA-in ambulance hlanna hun a hmang.
He hunah hian R Lalngheta chuan Central YMA hruaituten Central YMA-in ambulance dang an neih belh tak avangin, Cachar bial leh a chhehvel a Mizo mipuite leh damlo phurh ngaite tana tangkai taka an hman zui atan he ambulance hi Silchar Branch YMA hnena hlan an nih thu a sawi.
Silchar Branch YMA aiawhin President K. Vanlalhriata chuan lawmthu a sawiin, Central YMA in duhsak taka Silchar Branch YMA hnena ambulance an hlan chu Silchar a YMA leh Mizo mipuite tan chuan bungthar kaina chhinchhiahtlak tak a ni a. He ambulance hi Silchar leh a chhehvela Mizo awmte mai bakah, Silchar a Kristian Kohhran hrang hrangte leh mamawhtute tan pawh tangkai taka hman a nih ngei a beisei thu a sawi bawk.