UD&PA Minister K Sapdanga chuan ram hruaitu hmasate leh ram hmangaihtu ten nunna an hlohna Quarter Guard building an humhalh dawn tih a sawi.
Inrinni khan Home Minister ni bawk K. Sapdanga chuan Assam Rifles (AR)-in an chhuahsan tak ram, Aizawl khawpuia lailia awm chu hmang tangkai tura sorkar hmalakna kalpui mekte a hmunah tlawhin a endik a. AR chhuahsan ram hman tangkai dan turah ruahmanna (master plan) fel tak siam lawk vek a nih thu a sawi a. “Hnathawktuten kan mitthlaa kan hmuh dan aiin hna an lo thawk nasa a, a lawmawm hle a ni,” a ti.
K Sapdanga chuan khaw chhiat avangin duh angin hna a kal chak theih loh thu sawiin, ruah a ban deuh tawh avangin October thla atang chuan hei aia chak zawka hna thawh theih beisei a nih thu a sawi a. Sorkar hmalakna leh hnathawktute sulhnu chu hmuh a nuamin a hlimawm hle tih a sawi a. Hnathawh kalphungte thlithlaiin a khat tawka tlawh a tum thu a sawi bawk.
Lammual hnuaia Bypass road siam mek chungchang sawiin, kawng laih hna chu thahnem tak an thawk tawh tih a sawi a. Mipuite tana tangkai tur hmunhma hrang hrang a awm dawn a, thing uihawm tak takte chu a theih chen chenah zuah hram tum a nih thu a sawi a; mipuiten an mamawh kawngpui erawh siam ngei a ngai tih a sawi.
K Sapdanga chuan, “Treasury Square leh Bazar Bungkawn inkarah motor riah phal a ni tawh dawn lo va, mipuite tana hman tur parking lian tak tak siam a ni ang,” a ti a. Sipai in hlui, ram hruaitu hmasate leh ram hmangaihtu ten nunna an lo hlohna leh an channa hmun Quarter Guard building erawh thiah lova humhalh a nih tur thu a sawi bawk.
PWD leh PHE hotute chuan ruahmanna kal mekah he hmunah hian Heritage Court leh Exhibition neihna tur hmunte siam a ni dawn a. Building awm sate chu thawm that tur niin sak belh ngai te pawh sak a ni dawn tih an sawi.
Lammual hnuaia Bypass road siam thar hian Post Office bulah lut tanin, Saron Veng BCM biak in bulah a chhuak dawn a ni. He kawng siam hna hi za-a 17 chu thawh zawh tawh a ni. Kawngpui zauh hna kalpui mek pawh chhunzawm zel a ni a, hei pawh hi zawh fel thuai beisei a ni bawk.
He hunah hian Land Revenue leh I&PR Minister B. Lalchhanzova bakah PWD, PHE leh UD&PA hotute leh Aizawl Mayor-in an an tawiawm a ni.