Aizawl: Food, Civil Supplies & Consumer Affairs Minister B. Lalchhanzova chuan Northeast Gas Grid Project kaltlanga Indradhanush Gas Grid Limited (IGGL) hnuaia Panisagar – Aizawl Pipeline (km 119.450 a thui) phum hna thawh mek chu Thawhtanni khan Tuidam, Mamit district-ah sorkar leh engineering hotute nen an hmunah an endik.
Minister chuan ram hrang hrang buaina avanga LPG harsatna awm thin sutkian nana gas pipeline connection kalpui a nih thu sawiin, March-April 2027-ah Mamit khawpui leh March-April 2028-ah Sihhmui, Aizawl thleng thlunzawm hman beisei a nih thu a sawi.
Project Rs vaibelchhe 491 hu hmang hian Tripura leh Mizorama khaw 20 paltlangin pipeline phum a ni dawn a, gas pipe hmanga Mizoram thlunzawm a nih hunah LPG harsatna a kiam bakah CNG hmanga lirthei tlantir theih a nih tur thu sawiin, a rang thei ang bera mipuiten an hman theih nan IGGL leh department hrang hrangte thawhho zel a pawimawh thu leh sorkarin a tul apiangah puih a inpeih reng thu a sawi bawk.
Tripura Natural Gas Company Limited (TNGCL) leh Aizawl khawpui thlunzawmna tur Rs vaibelchhe 491 hu project hnuaiah hian 12 inches diameter a lian gas pipe phum niin, Tripura chhunga khaw paruk leh Mizoram chhunga khaw 20 an paltlang dawn a ni.
Hnathawh mekna Tuidam khaw kawng zauhna meter 1.5 vela thui thlenga harsatna awmte pawh a hmunah endikin, PWD leh IGGL hotute chuan kawng thawmthat ruahmanna awmsa nen a insut buai loh nan thawhho dan tur an sawi hi nghal bawk.