Aizawl: BJP Mizoram chuan Thawhtanni khan State Office Mipui Run, Upper Republic-ah Karthar Inhlanna leh Political Session hun an hmang a, he hunah hian State General Secretary Delson Notlia, MDC chuan thu sawiin sorkar laipui hmalakna ‘Operation Trident’ thlawp a pawimawh tih a sawi.
Delson Notlia chuan Union Home Minister Amit Shah-a’n ruihhlo network tihbo nana beihpui lian tak ‘Operation Trident’ a puang leh a hlawhtlin thu a puang tih sawiin, Assam, Mizoram leh Manipur-a ruihhlo tawlhrukna kawng tihchah mek a nih thu leh sorkar laipuiin December ni 31, 2029 hmaa India rama ruihhlo tihbo vek a tumnaah Mizoram sorkar, Central YMA, Kohhran leh khawtlang ten thlawp tlat a pawimawh thu a sawi.
Congress party-te’n SIR leh NEET exam put ru chungchanga sorkar laipui leh Prime Minister bei zawnga politics chhe tak an hmang chu demin Delson Notlia chuan, SIR hi UPA sorkar hun laia zawm duh tawh loh, ramri leh himna tur leh ram chhunga dan lova awm te dap chhuaha electoral roll atanga paih chhuahna hmalakna pawimawh tak a nih zawk thu a sawi.
Delson-a chuan BJP-in Kristian-te Hindu-ah an inlet thin tia Congress party-ten dawt hmanga mipuite an bum fo thin chu thu belhchian dawllo a nih thu sawiin, Mizoramah BJP member Hindu-a inlet pakhat mah an awm loh thu leh political gain hmanga dawt zirtirna darh thin chu tihtawp a tul thu a sawi bawk.