Home Minister K. Sapdanga chuan ‘Operation Trident’ avangin Mizoramah ruihhlo lut nasa tak khuahkhirh theih an beisei thu leh ruihhlo tawlhrukna kalkawng a nih avanga a hming lang ve chhen pawh a ziaawm phah an beisei thu a sawi.
Thawhtanni khan a pisa-ah thuthar thehdarhtute kawmin home minister chuan tun hnaia Mizoram Police, Narcotics Control Bureau (NCB) leh Directorate of Enforcement (ED) tangkawpin inter-state leh international ruihhlo tawlhrukna inthlunzawm chhu chat tura beihpui thlakna, Operation Trident an kalpui leh agency hrang hrangte thawhhona chungchang a sawi fiah.
Home minister sawi danin Operation Trident hi ruihhlo tawlh hluar lutuk chhut chah nan leh a hotu liante man chhuah nana ruahman a ni a. October 23, 2026 khan Mizoram, Assam leh Manipur-ah a rualin beihpui hi thlak a. Department hrang hrang atanga lak khawm multi-agency composite team 38-te chu hmun 38-ah a rualin tirh chhuah an ni a, Mizoram chhungah Aizawl, Champhai, Lawngtlai leh Zokhawthar-ah te, Manipur-ah Churachandpur leh Assam-ah Guwahati thlengin surgical precision hmangin hma an la a ni.
Mi 18 man an ni a, detonator 500 leh pawisa fai Rs nuai 12 man niin, ruihhlo tawlhnaa hman bank account 1,424 freeze an ni a, sum leh pai thil neih hlutna Rs vaibelchhe 17.82 hu provisional attachment tih a ni bawk.
Mizoram Police chuan Assam leh Manipur Police nena tangkawpin rinhlelh mi panga an man a, chungte chu Guwahati atangin Basanta Doley, Elajyoti Pegu Doley leh Jitu Kalita te an ni a, Churachandpur atangin Paotinmang Haokip leh Nemhoiting Khongsai te an ni.
ED Aizawl leh Imphal Sub-Zonal Office te chuan Prevention of Money Laundering Act (PMLA) hnuaiah money laundering case pathum bawhzuiin narco-hawala operator leh mini-ATM counter operator-te an bitum a, PMLA Section 19 hnuaiah mi paruk an man bawk.
NCB pawhin Mizoram chhung hmun 13-ah beihpui thlakin mi pasarih an man a, Aizawl atangin Lalduhawma leh Suitei te an man a, Champhai atangin Teresa, Lalbiakhluna, Lalliansanga, Pency leh Laltlanzova Pautu te an man.
K Sapdanga chuan operation hi Mizoram Police-in an hriat lawk thu sawiin, “An zep a, operation hi a len em avangin kan thup a, a leak out kan hlau a. An tih hma atangin kan lo hria a. Amaherawhchu, a hlawhtlin theihna turin theihtawpin police-in kan tihdan pangngaiin, kan puanzar hma chuan khawiah mah leak out lovin hetiang hian kan puitlin thei ta a ni,” a ti.
Operation avang hian Mizoramah ruihhlo lut nasa tak khuahkhirh theih an beisei tih sawiin home minister chuan, “A chhunzawmna atan theihtawp kan chhuahin kan veng chhunzawm ang a, he drugs trafficking nasa tak, mualphothlak angreng tak, a kalkawng kan nih avanga kan hming lang ve chhen pawh hi a ziaawm phah kan beisei,” tia sawiin, central agency-te leh Delhi sorkar hmalaknaah lawmthu a sawi.
Home minister chuan Mizoram chu ruihhlo kawngpui a nihna a ziaawm zel nan leh drugs-free Mizoram siam a nih theih nan beihpui hi chhunzawm zel a nih tur thu sawiin, “Mizoramah ruihhlo hi zaa za thununah kan inpuang ngai lo va, sumggling bakah contra band mipui tana pawi chi-ah hi chuan kan thikthu a chhe rengin, kan police-ten thahnem an ngai a. Police ringawtin tihsen a ni lo va. Ramri biala hlawh pawh nei lova thawh hlawk em em, a bikin YMA, YLA leh MTP anga civil society-te thahnemngaihna leh puihna avanga hetiang hlawhtlinna lian tak hi hmu thei thin kan ni a. Kan lawm em em a ni,” a ti bawk.