November ni 1 thlenga hman tur Vigilance Awareness Week, 2026 chu Thawhtanni atangin ram pum huapin hman tan a ni.
Kumin Vigilance Awareness Week-ah hian thupui atan ‘Probity for Prosperity’ tih hman a ni a. He hapta pual hian Thawhtanni khan Mizoram sorkar hnuaia thawktu zawng zawngte chuan rinawmna leh dikna zawm tlat turin intiamkamna, Integrity Pledge an la a. MINECO Secretariat Building tualzawlah pawh Mizoram Secretariat officer leh thawktute’n General Administration Department Principal Secretary Sudhir Kumar kaihhruaiin intiamkamna hi an nei a ni.
Hemi hmalakna hnuaiah hian, Administrative Head, Department Head, Deputy Commissioner leh District Headquarter tina Superintendent of Police-te chu an hnuaia officer leh staff-te Central Vigilance Commission website (www.cvc.gov.in) kaltlanga Online Integrity Pledge lak tir vek tura hriattir an ni bawk.
Mizoram sorkar hnuaia Vigilance Department ruahmanna siam dungzuiin he week hman chhung hian hmalakna hrang hrang a awm dawn a. Programme pui ber chu Vana Pa Hall-ah October ni 28, 2026 khian Workshop buatsaih tum niin Chief Minister Lalduhoma’n a hman pui dawn a. Hriat theih chinah Chief Minister tela Vigilance Awareness Programme lian tham hetiang a hman hi Mizoram chanchinah a tum hnihna tur a ni.