Aizawl: Higher & Technical Education Minister Dr Vanlalthlana chuan Mizoram State University (MzSU)-a thawk tur Group D hna lakah thu dik lova beihna an tawh nasat thu sawiin, merit-a an tlin miau chuan a chhungte an nih avanga lak loh chhan tur a awm lo tih a sawi.
Nilainia a pisaah thu thar thehdarhtute a kawmnaah zawhna chhangin Dr Vanlalthlana chuan, MzSU Group D hna lakah merit-a lak an ni tih sawiin, “Kan chhungte an nih avanga merit-a an tlin miau chuan lak loh chhan tur a awm lo,” a ti a. Merit list-a pakhatna chhungte chu court-ah kal an tum thu a sawi.
Dr Vanlalthlana chuan MzSU atan post 71 siam a ni tawh a, post 21 lak phalna neih a nih tawh thu a sawi a. Hna lak kal lai mek LDC post pahnih, driver post pahnih, dispatch rider post pakhat a awm thu a sawi bawk.
Minister chuan MzSU Bill hi March 4, 2025 khan pass niin, Aizawl-ah headquaters dah tura tih ni mah se, remchan zawkna avangin Lungleiah sawn niin February, 2026-a Mizoram State Assembly Session ah pass leh a nih thu a sawi.
MzSU dinna tur hian VC leh Registrar lak tum a nih laiin nominee zinga mi a inhnuhdawh avangin Search Committee din thar leh a ni a. Tunah hian VC leh Registrar la tura hma lak leh mek thu a sawi bawk.
“Lunglei lamah MzSU building luah tur hi kan ngaihven tawh a, thla tharah chuan kan tihfel theih kan ring a, finance-in pawisa min pe tawh a, building luah tur kan neih veleh kan insawn phei dawn a, chak leh zualin hna lak pawh kal pui kan tum,” Dr Vanlalthlan’n a ti.