Aizawl: Chief Minister Lalduhoma chuan Nilaini khan CM Conference Hall-ah Administrative Training Institute (ATI)-a Foundation Course zir mek Combined Civil Services Officer tharte nen inkawmhona a buatsaih.
Chief Minister chuan intihsiakna hautak tak paltlanga Mizoram tana thawk tura tling officer 34-te chu lawmpuina hlanin, ATI-a training tha tak an nei hmasa leh service hrang hrang a huhova an training tlang chu tha a tih thu a sawi a, pawl hrang hrang inpawh taka an thawhhova ram tana a hlawk a beisei thu a sawi.
Officer tharte pawhin chief minister chu zawhna hrang hrang an zawt a ni.
Combined Foundation Course kal mek officer 34-te hi MCS 20, MF&AS panga leh MIS pakua-te an ni.