Aizawl: New Delhi-a cham mek Labor, Employment, Skill Development & Entrepreneurship (LESDE) leh Sports Minister Lalnghinglova Hmar chuan Thawhlehni khan Skill Development Ministry leh Sports Ministry hotu lian te a kawm bakah, Mizoram-a invest duh company aiawhte nen an inkawm.
Skill Development & Entrepreneurship Ministry Secretary Debashree Mukherjee nen Kaushal Bhawan-a an inkawmnaah, Minister chuan PM-SETU leh PMKVY scheme hnuaia ITI tihhmasawn leh skill training kalpui dan te an sawiho a. Mizoram sorkarin kum 2024-a infiamna leh skill development kaihkawpa Olympic 2036 thleng tura thalai leh coach-te training pekna tur proposal a lo thehluh tawh chu tihhlawhtlin thuai a pawimawh thu sawiin, Secretary pawhin he proposal hi an zirchiang tawh a, phal chin mila her remin hma an lakpui ngei tur thu a hrilh a ni.
Sports Minister hian Youth Affairs & Sports Ministry Joint Secretary Vineel Krishna a kawm bawk a, Mizote tana hmabak eng bik infiamna discipline-ah chak zawka hma lak dan tur an sawiho a, Joint Secretary chuan Mizoram sorkar hmalakna ‘Empowering Mizoram Sports’ chu lawmawm a tih thu a sawi.
Thawhlehni vek khan Minister hian Hotel Ashok-ah Mizoram invest duh company leh institution aiawhte ‘business interaction’ neihpuiin, proposal-te zirchian a nih tur thu leh Mizoram tlawha zirchiang turin a sawm.