Aizawl: Information, Public Relations, Printing & Stationery (IPRP&S) Minister B. Lalchhanzova chuan Kochi, Kerala-a SCMS School of Technology & Management hmuna buatsaih ‘Rain International Nature Film Festival’ vawi 8-na chu Ningani khan a hmanpui a, festival neih chhung hian Mizoram chu ‘Focus State’-ah puan niin Mizoram film pali tihchhuah a ni dawn.
Minister chuan sik leh sa leh ramngaw humhalh pawimawhzia film hmanga inzirtirna buatsaihtu Jayaraj Foundation fakin, he festival hi Mizoram film siamtute tana Mizoram mawizia phochhuahna leh inkungkaihna tha zawk siamna hun remchang a nih thu a sawi a. Mizoram leh Kerala chu zirna, rinna leh khawtlang inpumkhatna kawngah inanna tam tak nei an nih thu sawiin, film leh culture hmanga ram pahnih mipui inkara inlaichinna tha zawk a din chhuah ngei a beisei thu a sawi bawk.
October 31 thleng awh tur he film festival hi National Film Awardee leh filmmaker lar Jayaraj buatsaih niin, United Nations Convention to Combat Desertification (UNCCD), NFDC leh Kerala State Chalchitra Academy te hriatpuia buatsaih a ni.
Festival hawnna inkhawmah hian Bangalore Mizo Association (BMA) member-ten Mizo hnam lam an entir a. Mizoram aiawh hian I&PR Joint Director Pratap Chhetri, PS to Minister Remlalliana Hnamte leh film siamtu pathum — Napoleon RZ Thanga, Lalruatfela leh K. Lalrinzuala te an tel a ni.