Aizawl: Higher & Technical Education Minister Dr. Vanlalthlana’n a pisa-a thu thar thehdarhtute a kawmnaa Mizoram State University (MzSU) chungchang leh hnalak dante a sawifiahna chu Congress Thalai chuan thil zahthlak takah ngaiin, minister hi amah inenfiah hmasa ber tur leh Govt. Mizo Higher Secondary School-a hna lak chungchanga thil dik lo ti tura DEO thusawi awm chu zawng chhuaka hremna pe turin sorkar an phut.
Ningania an thuchhuahah MPYCC chuan Nilaini-a Minister Dr. Vanlalthlana’n college zirtirtute zingah thawk tha leh tha lo tehna kalpui a ni dawn tih a sawi chu thil zahthlak tak a nih thu an tar lang a. College zirtirtute thawk tha leh tha lo a teh hmain amah a inenfiah hmasak ber a pawimawh thu leh, a thawhna thin Pachhunga University College (PUC)-ah ngei pawh tha tak leh tluang taka class la leh phawt turin an phut thu an tar lang.
Facebook Lawrkhawm Group-a ZPM Marini post pawh tar lang bawkin, Govt. Mizo Higher Secondary School-a Botany Casual Teacher an lak tumin Dr. Vanlalthlana laina hnai tak pakhat chu palina a nih laiin, an chhungte a nih avangin leh an mark a inhnaih avanga pakhatna zawk aia dah an tum thu DEO-in a sawi nia tar lan chu thil rapthlak tak a nih thu an tar lang a. Hetianga midang chanvo leh merit chhuhsak hreh lo leh thil dik lo ti ngam DEO chu hmuh chhuah a, hremna kaiawm tak pe turin Congress Thalai chuan sorkar leh a thuneitute an phut thu an tar lang bawk.