Aizawl: New Delhi-a cham mek, Mizoram Tourism leh Sports Minister Lalnghinglova Hmar chuan Nilaini khan sorkar laipuia Ministry of Tourism Secretary Bhuvnesh Kumar, Ministry of Information & Broadcasting Secretary Chanchal Kumar leh MDONER Statistical Advisor Dharmvir Jha-te a kawm a, Mizoram mamawhte thlenin hmasawnna hnathawh chak zawka kalpui dan tur ruahmanna an siam.
Lalnghinglova Hmar chuan Mizoram chu state lian lo leh mihring tam lohna a ni a, industry lian an neih rih loh avangin tourism chu sorkar tan sum thawh chhuah theihna remchang ber a ni, a ti a. Theihtawp an chhuah mek a, hmasawnna lang mek piah lamah lian zawka hma la turin sorkar laipui puihna an mamawh thu a sawi a. Aizawl chhehvel tourism circuit-a siam tura Rs vaibelchhe 250 ruahman a nih thu a sawi a, sorkar laipui puihnaah lawmthu a sawi bawk.
Tourism secretary pawhin Mizorama tourism project-te a theih anga a hmalakpui tur thu leh mikhual dawl zo tur tour guide leh thlenna tha tam zawk neih a tul thu a sawi.
Sports minister ni bawk hian Aizawl International Half Marathon (AIHM) 2027 zau zawka puanzar leh thehdarh kawngah I&B ministry thawhpui dan tur a sawipui a, secretary pawhin I&B leh ministry dangte nen thawhho dan ruahmanna a siampui nghal a ni.
Ministry of DoNER hotute nen pawh he Ministry hnuaia Mizoram sorkar project kalpui mek dinhmunte thlir dunin, hmasawnna chak zawk a awm theih nan Mizoram sorkar hnathawkten DoNER hnathawh dan zirchiang tura exposure visit neih an rel dun bawk a ni.