Aizawl: Mizorama zirna lam pawl upa ber Mizo History Association (MHA)-in Annual Conference cum Seminar vawi 46-na chu Government Aizawl North College-ah Ningani atanga hmang tanin, Mizoram University (MZU) Vice Chancellor Prof. D.C. Deka chu khuallian a niin a hmunah hian ‘Historical Journal Mizoram’ a tlangzarh nghal a ni.
October 30, 2026-a tiak tur he khawmpui hawnna inkhawm hi MHA Vice President Prof. J.V. Hluna’n a kaihhruai a, Secretary Dr. Benjamin Ralte-in report a pe bawk a, Treasurer Dr. Lalthangpuii’n lawmthu sawiin inkhawm hi a khar a ni.
Kumin hian an seminar thupui atan ‘Revisiting Colonial Rule in Mizoram’ tih hmangin, British-in Mizoram an awp chungchang zir chianna thuziak chi hrang hrang 22 zet ngaihthlak leh sawiho a ni ang a, a bul tan nan President Prof. Sangkima thuziak ‘British Religious Policy Towards Christian Missions in India with Special Reference to Mizoram’ tih chu zir ho a ni.
Khuallian Prof. Deka chuan British-te thatna ber chu thil chhinchhiah leh ziaka dah that fel tak an nei thin hi a nih thu sawiin, thangthar lo awm zel turte tan hian documentation hi an chakna leh chak lohna hriatna atana a pawimawh thu leh tunlai digital khawvelah phei chuan cloud leh thil dang hmanga awlsam taka vawn thlap tawh theih a nih thu a sawi.
Kum 1980-a din MHA hian kum tin hetiang seminar hi nei thinin, thuziak leh zir chianna an sawihote hi ‘Historical Journal Mizoram’ tiin a buin an chhuah thin a ni.