Mizoram State Museum chu Zarkawt atangin MINECO lamah sawn a ni a, nilaini khan a hawnna neih niin, nimin atang khan tlawhtu an tam tan hle.
MINECO lamah hian sorkar pisa leh hmun pawimawh tak tak sawn a ni nual tawh a, building hrang hrang sak mek a la awm bawk. Tin, heng bakah hian sorkar hnathawkte tan quarter tha em em mai siam teuh a ni a, luahtu pawh an thahnem hle.
Kan khawpui tawtzia kan hria a, pisa dawr dawn pawhin lirthei parking-ah kan buai fo a, traffic jam a awm duh hle bawk. Hengte a nih avang hian sorkar pawhin MINECO lamah insawn zai a rel chho zel a, pisa tam tak a sawn ta bawk a ni.
Khualzin an pung zel a, ram hran atanga rawn kalte hian kan Museum hi tlawh ngei an tum bawk thin. Tuna zalen taka teihawi theihna tura a awmna hmun sawn a ni ta pawh hi a lawmawm a, lirthei chetvelna thlengin a awlsam phah ngei a rinawm.
Sorkar in MINECO ah ram zau leh tha tak a nei a, hetah hian department tam tak sawn tawh niin, la sawn ve lohte pawh an insawn thuai theih nan chak zawkin hma la chho zel se la, kan khawpui chhung hi a thawl nawm zawk dan i ngaihtuah zel teh ang u.
Khawpui chhunga sorkar pisa awm hi a that rualin, lirthei pung zel avangin harsatna kan tawh phah ta fo thung a, chutiang vaikiang thei tura khawpui chhung tho si, a hmun bika siam deuh MINECO lam a awm hi a lawmawm a, department la insawn ve lote pawh an insawn thuai theih dan tur ngaihtuah zel bawk teh ang u.