Cockroach Janta Party (CJP) dintu, Abhijeet Dipke-a chuan INDIA tangrualin November 1-a electoral roll special intensive revision (SIR) an duh lohna leh Chief Election Commissioner (CEC) Gyanesh Kumar-a bâng tura nawr nana pun khawm an huaihawt chu an thlawp tih a puang.
“GYANU MUST GO! Cockroach Janta Party chuan INDIA tangrualin November 1-a rally an buatsaih tur chu a thlawp a. Eng dang zawng aiin ram a pawimawh,” tiin Dipke-a hian Nilaini khan X-ah a tar lang.
CJP-in thuchhuah an siamah pawh mipui rorelna chu mipuiin an duh an thlan hmanga sorkar siam a ni a, sorkarin tute nge vote thlak thei tur thutlukna a siama innghat a ni lo tih an tar lang.
SIR kalpui chu he kalphung nena inkalh a ni a, vote nei thei ngei tur tam tak electoral roll atanga an hming paih a ni tih an sawi.
CJP chuan CEC Kumar-a chu a bân ngei an phut tih a sawi a, Election Commission of India (ECI) chu rinngama a awm thar leh a ngai tih an sawi.
Dr BR Ambedkar-a leh Prime Minister Jawaharlal Nehru-a te telin ram danpui siamtuten puitling tawh phawt chu inang tlanga vote an neih theihna turin rinngamna an nei a, chi, sakhua, nihna, thiamna leh eibar dinhmun avanga inthliarna an siam lo niin an tar lang.
Dan siamtuten an duan dan phungah puitling tawh phawtin an duh an thlan theihna huang chu khuakhirh aiin huang zauh zel zel a nih thu an sawi a. SIR hian chu chu kalin vote nei ngei turte neih lohtir an ni ta zawk niin an sawi.
“Kalphung hi mawlmang tak a ni: mipui rorelna kal danah a paih zawng ni lova khua leh tuite lak luh belh zel a ni mai,” tiin CJP hian thu an chhuah.
Ambedkar-a hmathlir chu sorkar leh danpui hnuaia institution zawng zawngte chuan mi tinin politic-ah intluktlanna an neih vek a ni a. ECI chu vote nei theiten vote an neihna tura hma lak zel chu a mawhphurhna a nih thu an sawi.
“Kan danpuiin puitling tawh phawtin vote thlak theihna dikna chanvo min pe a. Kan chanvo hi a nei ve thei lote hnena pek tur dan pawh a tel a ni,” an ti.
CJP hian inthlanna zalen leh dik a awm theih nana beitute chu an thlawp tlat zel dawn tih an sawi bawk.