Israel inthlanpuiah party mala chak zawk an awm hmel loh va, Benjamin Netanyahu-a chu a kaihhruai right wing tangrualten sorkarna khawp chakna chang lo mah se prime minister lailawk a nih zui rih hmel hle.
He chanchin ziah lai thlenga vote tla chhiar tawhah Israel-a broadcaster lian pathumte chuan Netanyahu-a kaihhruai right-wing, far-right leh ultra-Orthodox party-te chuan Knesset-a thutna 120 awmah 53 an lak hmel a, a khingtu, Gadi Eisenkot-a kaihhruai tangrualin 48 an lak hmel tih an sawi.
Arab Israeli-te awmna party chuan beisei loh takin bial 19 an chan hmel a, hei vang hian Eisenkot-a hian thuneihna a chan zawh hmel loh phah.
Vote la chhiar mek a nih avangin la danglam thei mah se Eisenkot-a kaihhruai, Netanyahu-a duh lotu party, centre-left atanga hard right thlengin, sorkar siam tur khawpa bial lak an ngah zawh a beiseiawm loh.
Sorkar siam tura indawrna kalpui a nih chhungin Netanyahu hian prime minister nihna a chelh lailawk a ngaih hmel a, sorkar siam thei khawpa thlawptu ngah an awm loh chuan nakumah inthlan that pawh a tul thei dawn a ni.
Netanyahu-a hian a kaihhruai Likud party inkhawmah Ningani zing dar 3:00 (India-a zing dar 06:30)-a thu a sawinaah chuan ‘sorkar chak leh right-wing sorkar an din ngei dawn’ tih a la sawi.
Israeli sipaiten hlawhtlinna an chante sawi chhuakin US President Donald Trump-a nena Iran an beihna pawh Iranian ‘hlauhawmna chu vawi khatah’ tihchah vek tumna a nih thu a sawi.
Trump-a pawhin Israeli-te chu Iran-a ‘hna zo turin’ Netanyahu-a thlang turin a chah a, an prime minister hian a ti tha tih a sawi bawk.
Netanyahu-a pisa hian inthlanah Iran buaina chu campaign nan a hmang nia sawina awm chu pha.
Pathiannia Israel inthlanah hian vote 77.7% tlain kum 20 chuang hnua a tlak hnem ber a ni.