Home Minister K. Sapdanga’n tun hnaia ruihhlo beihpui thlakna, Operation Trident kalpuiah ruihhlo tawlh rututen hlawhfa an rawihte chauh ni lo, a tawlhtu berte an zirchiana man tul nia an hriat hmun 38 hup thei nia an hriatte ruahman ang thlapin an hup fai vek tih a sawi.
Ningani khan home minister hi Central YMA hruaituten a pisaah kawmin, tun hnaia Mizoram Police, Narcotics Control Bureau (NCB) leh Enforcement Directorate (ED) te tangkawpa ruihhlo do beihpui hlawhtling taka an kalpui avangin lawmthu an sawi.
Central YMA hruaitute nena an inkawmnaah K. Sapdanga chuan ruihhloin Mizo mipui leh thalaite a sawisak retheihzia leh he ruihhlo doa tha thawh nasa bertu chu YMA an nih thu sawiin, Central YMA-in Operation Trident hlawhtlinna lawmna hun an buatsaihnaah thinlung takin lawmthu a sawi.
Home minister chuan union home ministry-in beihpui a thlak, Operation Trident chu Central YMA kumpuan ‘Ruihhlo do’ nena inrem thlap a nih avangin Mizoram tan vanneihna leh hlu tak a nih thu a sawi a. Ruihhlo hi Mizoram tan hmelma lian ber a nih avangin a do dan pawh nem delh delh a theih tawh loh thu sawiin, tun hmaa thalaite tana Mizoram hmun him lo a nih thin chhan chu tun hnuah erawh ruihhlo tawlh ruk leh zawrh chingte tana hmun him lovah chantir an tum tawh thung tih a sawi.
K. Sapdanga chuan Operation Trident hmang hian ruihhlo sumdawnna hnuk bul leh an hotu pawimawh tak takte man an nih thu sawiin, Mizoramah ruihhlo tawlh an tlem a rin thu a sawi a. A neih hmain ruihhlo sumdawnna bulte chu hun rei tak an chhui chiang a, an hnuk bul hriat chian a nih hnuah beihpui thlak tih a sawi a, “Kan bitum hmun 38-a mite kan hup kim vek thei a ni,” a ti.
Operation Trident hi sawrkar laipui hnuaia mite kaihruai ni mah se, Mizoram, Assam leh Manipur Police te chu a taka hma latu an nih thu a sawi a. Khawtlang leh tlawmngai pawl ten an thawhpui avangin lawmthu a sawi bawk.
Home minister chuan operation hlawhtlin lawmna Central YMA hruaituten an nei thei chu thinlung takin a lawm tih a sawi a. YMA chu Mizoramah ruihhlo do kawnga hma la nasa ber an nih thu sawiin, Operation Trident chu a tawpna ni lovin a bul tanna a ni a, ruihhlo do kawngah beihpui thlak zel turin YMA a sawm nghal.
Performance ringawt chhuang lo va, thalai engzat nge chhanchhuah a awm, chhungkaw engzat nge kehchhia pumpelh a, NGO, CADS, excise leh police-te hahna eng zat nge chhawk a nih tih zawnga ngaihtuah hian lawmawm a tih thu sawiin home minister chuan, “Home minister ka nihna mai bakah Mizoram mipui aiawhin Operation Trident-a ngaihtuahna leh tha thawhtu zawng zawng leh Central YMA-te chungah thinlung takin lawmthu ka sawi a ni,” a ti.
Central YMA President R Lalngheta chuan Mizoramah ruihhloin khawtlangah harsatna a thlen a, Mizo thalaite a sawp nasat mek laia sum leh pai itna avanga hemi kawnga inhnamhnawih mi eng emaw zat man chhuah an ni chu lawmawm an tih thu sawiin, tun tum operation atang hian a bupui luh chhuahah an inngaih thu a sawi.
R Lalngheta chuan YMA chu ‘Ruihhlo Do’ kumpuana hmangtu a nih angin, ruihhlo hi Mizo hnam tichhetu a nih avangin hian ruihhlo tawlhtute hi hmelma lian takah an dah tih a sawi a. Sorkar chakna hmangin an inhai chhuak zel dawn tih a sawi a. Sorkar, mipui leh NGO te thlawpna an mamawh tih sawiin, “Tun aia nasa zawka kan tan a ngai a. YMA hian sorkar leh mipuite nen kan hmachhawn zel ang a, kan hneh ngei kan beisei,” a ti.
Tar lan tawh angin kar kalta Zirtawpni khan Operation Trident hi Mizoram, Assam leh Manipur-ah kal puiin mi 18 an man a, bank account 1,424 an hrensak.