Aizawl: Chief Minister Lalduhoma chuan Ningani khan Vana Pa Hall-a buatsaih, Aizawl City Local Council Association General Assembly vawi 4-na chu khuallian niin a hmanpui a, local council-te chu a bulthuta hmasawnna hnathawktu leh mipuite harsatna hmuhpuitu an nih angin Aizawl khawpui tihhmasawnna kawnga mawhphurhna pawimawh tak chelhtute an nih thu a sawi.
Chief minister chuan local council member nihna chu eizawnna ni lovin khawtlang rawngbawlna zawk a nih thu a sawi a, eng party pawh ni se ram leh khawtlang hmasawna atan thawh a tul thu a sawi a. Aizawl khawpui chhung leh a chhehvela sorkar hnathawh langsar zual SASCI leh hmasawnna hna hrang hrangte sawiin, Central-in Transforming India 2047 a duang angin Mizoram pawhin Transform Mizoram Vision 2047 kalpuiin kalphung thara inpeih a tul thu a sawi bawk.
Lalduhoma chuan Assam Rifles sawn chhuah tak hmun tana advisory committee rawtna anga kut thlak tan a nih tak thu leh, Aizawl chhung hmun 26-a mtr 8,135-a thui Storm Drainage Network siam mek a nih atangin SASCI 2024-25, 2025-26 leh 2026-27 hmanga hmasawnna hna hrang hrang project lian tak tak — Central Jail, ITI Complex, Market Building, Community Centre, Working Women Hostel, leh kawng hrang hrang sial leh up-grade hnathawhte a sawi a. Financial management tha tak an neih avangin SASCI atangin incentive Rs vbc 350 zet an dawn thu leh kuminah pawh incentive tam zawk beisei a nih thu a sawi.
Local council member-te chu mahni veng huam chhungah ruihhlo dova hnatlang leh veng chhung thianghlimna kawngah theihtawp chhuah turin a chah bawk.