Aizawl: Bengaluru-a E-City Mall-ah Mizo thil siam chhuah zawrhna dawr thar ‘MadebyMizo Kiosk’ chu Inrinni khan Mizoram Handloom & Handicrafts Development Corporation Ltd. (ZOHANDCO) Chairman JK Dawngzuala’n a hawng.
Kiosk hawngtu ZOHANDCO Chairman JK Dawngzuala chuan he MadebyMizo Kiosk hi Mizo zawng zawngte’n tangkai taka an hman a duh thu sawiin, Mizo kuthnu leh thil siamte hnam dang laka phochhuah chu ZOHANDCO tum ber pakhat a nih thu a sawi.
Dawr dinna atan hian Ministry of MSME hnuaia scheme ‘Raising & Accelerating MSMEs Performance’ (RAMP) hmangin Rs. 17,48,962 hman ral a ni a, ZOHANDCO hi Commerce, Industries, Geology & Mining Department hnuaia RAMP scheme MZ4 – Marketing Intervention Implementing Agency an nih anga buatsaih a ni.
Madebymizo kiosk, Bengaluru-ah hian Mizo siam food leh beverages zawrh chhuah phawt a ni. MZ4 – Marketing Intervention hnuaiah hian Mizo zawng zawng te hman theih tur made by mizo brand siam a ni a, hei hi common brand a niin, registered brand erawh a ni lo. He brand hnuaiah hian Mizoten anmahni pual brand bil hmang thovin, market an kalpui thei dawn a ni.
Made by Mizo brand a nih ang ngeiin, khawvel puma Mizote a huap vek a ni a. Ram leh ram indaidannain Mizote a phuar loh nan, online hmanga an inhman tawm theih tur madebymizo.com, e-commerce website hawn a lo ni tawh bawk a ni.
He website a inziak lut Mizote thil siamchhuah offline-a zawrhchhuah nan heng kiosk-te hi din an ni.