Aizawl: Agriculture Minister leh bialtu MLA P.C. Vanlalruata chuan Inrinni khan Chhingchhip Venghlun Bazar-ah kum upate leh vohbikte puala hun buatsaih ‘Samajik Adhikarita Shivir’ chu khuallian niin a hmanpui a, he hunah hian Rashtriya Vayoshri Yojana (RVY) scheme hnuaiah kum 60 chunglam leh vohbik mi 92-te hnenah an taksa mamawh hmanraw chi hrang hrang a thlawna sem a ni.
Khuallian P.C. Vanlalruata chuan sorkar laipuiin kum upate leh vohbikte tana ruahmanna tha tak a siam chu lawmawm a tih thu sawiin, hetiang tanpuina hian vohbikte leh kum upate nun a tihawlsam bakah chhawmdawlna tha tak a thlen thu a sawi a, Mizoram mipuite’n he scheme pawimawh tak hi an hlawkpui zel theih nana hmalak chhunzawm zel a nih tur thu a sawi bawk.
He Rashtriya Vayoshri Yojana (RVY) scheme hi sorkar laipui hnuaia kalpui niin, Artificial Limbs Manufacturing Corporation of India (ALIMCO) kaltlangin kum 60 chin chunglamte mamawh wheelchair, beng hriatna khawl leh tarmit te a thlawna sem thin a ni.