Miss Mizoram 2020 Zirsangpuii chu Indian Institute of Technology (IIT) Kanpur-a kum tina neih thin, cultural festival ropui tak ‘Antaragni’ ah Judge member (endiktu) ni tura sawm a ni. IIT Kanpur hi Govt. of India (NIRF) Ranking-ah pawh India rama engineering college tha ber te zinga mi (Top 5) a ni ziah a, ram pum huapa zirna in ngaihsanawm leh pan hlawh ber pakhat a ni.
Antaragni’26 hi Asia khawmualpuia zirlai rualten festival an buatsaih lian berte zinga mi a ni a, Pathianni khan a vawi 61-na hlawhtling taka khar a ni. Ni li chhung he hun hlimawm tak hman chhung hian ram chhung hmun hrang hranga college 350 chuang atangin zirlai 30,000 zet an tel a, ram pum huapa zirlaite tana talent entirna hmun pawimawh ber pakhat a ni.
Zirsangpuii hi IIT Kanpur Media and Cultural Council te chuan an festival-a ropui leh mipui ngaihven hlawh ber pahnih—Ritambhara National Fashion Runway Finals leh Mister & Miss Antaragni Finals endiktu ni tura sawm a ni a. Ritambhara hi India rama College glamour showcase lian ber pawl a ni. Mister & Miss Antaragni erawh zirlaite zinga pian leh hmel tha, fing leh inrintawkna nei tha berte atanga thlan an ni thung. He intihsiaknaah hian IIT Kanpur mai ni lo India rama college tha ber berte atangin contestant an tel a ni.