Mizoram chhung leh pawn atangin EverHome Youth Icon 2026 Audition Round paltlang mi 139 an awm a, November ni 3, 2026 (Thawhlehni) zanah First round intihsiak tan a ni ang.
LPS Vision Production buatsaih zai intihsiakna EverHome Yoth Icon-ah hian application form lak chhuah ngai lovin virtual audition hmangin intihsiakna neih a ni a, mi 884 ten Telegram leh WhatsApp kal tlangin an zai video te an theh lut a. Judge ten uluk taka an endik hnuah Audtion Result an peih fel ta a, mi 800 chuang atangin round hmasa ber intihsiak hmachhawn tur mi 139 thlan chhuah fel an ni ta a ni. Audition patlang te hming hi LPS Facebook leh Instagram ah te tar chhuah a ni bawk.
Mizoram chhunga district hrang 11 atangin Audition round patlang an awm vek a; Aizawl District in ngah berin 48, Champhai District atangin 8, Hnahthial District atangin 8, Khawzawl District atangin 8, Kolasib District atangin 14, Lawngtlai District atangin 3, Lunglei District atangin 14, Mamit District atangin 8, Siaha District atangin 3, Saitual District atangin 9 leh Serchhip District atangin 13 bakah Manipur atangin 2 leh Assam atang mi pakhat te an tling a ni.
First Round intihsiak hi November ni 3, zaninah neih tan a ni dawn a, Contestant te chu an zai zanah dar 7:00 p.m ah LPS Office, Zarkawt thleng tawh tura ngen an ni a. Zai rem nan Guitar emaw Keyboard emaw hman theih a ni a, a pahnihin hman kawp a rem dawn lo. Contestant te chuan hla chang 1 leh a thunawn emaw thunawn nei lo chu chang hnih an sak phalsak a ni.
Tarlan tawh thin angin, EverHome Youth Icon 2026-ah hian Judge pathum – Victor Vanlalhruaia, Rosy K. Remsangpuii leh Andrew Laltlankima te chuan zai intihsiak an endik leh dawn a, Youth Icon atana thlanin Rs. nuai 2 a dawng dawn a, pahnihin Rs. nuai 1 leh pathumnain cheng sing 7 an dawng ang.