Aizawl: Aizawl West II bial huam chhunga veng paruk – Dinthar, Tuikual North, Tuikual South, Vaivakawn, Kanan leh Dawrpui Vengthar te tana duan ‘Aizawl West II MLA Cup 2026’ chu Thawhlehni zan khan Youth Activity Centre, Dawrpui Vengtharah, bialtu MLA leh Sports Minister ni bawk Lalnghinglova Hmar chuan khuallian niin a hawng.
Lalnghinglova Hmar chuan he MLA Cup buatsaih a nih chhan ber chu bial chhung mipuite inpawhtlanna leh naupang zawkte talent haichhuaha tahhriam a nih rualin, infiammite tan inelna nuam leh hlimawm a nih tur thu a sawi a. Basketball, Football leh Futsal-ah te naupang zawkte tan inelna siam a nih rualin, Badminton-ah erawh kum upa lam thlengin intihsiakna huang zauh a nih thu a sawi.
Bialtu MLA hian veng paruk atanga infiammi kalkhawmte chu theihtawp chhuaha inelna thianghlim leh hlimawm tak lantir turin a chah a, bial mipuite pawh MLA Cup khelhnaah a tam thei ang kal thin turin a sawm bawk.
Aizawl West-II MLA Cup-ah hian infiamna chi ruk – Basketball, Badminton, Cricket, Football, Futsal leh Volleyball – ah veng hrang hrangte hi an inel dawn a. November 26 zan hian Tuikual North Futsal Ground-ah khar a ni ang.