Aizawl: Larsap General (Dr) Vijay Kumar Singh (Retd) chuan Nilaini khan Youth Recreation Centre (YRC), Falkland, Aizawl-ah Zo Inspiration Foundation (ZIF) buatsaih ‘Capacity Building & Second Beneficiaries Meet’ chu khuallian niin a hmanpui a, khawtlanga dawmkan ngai leh mi retheite chhawmdawl kawnga an hmalakna chu fakawm a tih thu leh tanpui ngaite tan lakpui zawnga pawl hrang hrangte thawhhona a pawimawh thu a sawi.
Larsap chuan Zo Inspiration Foundation-in a din ata charity leh medical aid programme kaltlanga tum 100 chuang feh chhuaka damlo na zual mi 3,000 chuang tana tanpuina Rs vbc 3 aia tam an sem chhuak chu ropui a tih thu sawiin, Kristian nun nena inhmeh taka mawhphurhna la chhunzawm zel tur leh sorkar hamthatna awm te pawh ngaihvenpui thin turin a fuih a ni.
Larsap hian Samaritan Association for the Blind, Durtlang hnenah Zo Inspiration Foundation Award a hlan nghal bawk.
He hunah hian Central YMA President R. Lalngheta chu Khualzahawm tura a tel a. Aizawl khawpui chhung leh pawn atangin hamthatna dawngtu mi 212 te leh thilpek pe thintute an tel a ni.
June 7, 2020-a din, Zo Inspiration Foundation hian kum 2020 atanga 2026 inkar khan chenna in nei lo mi 25 te in a sak sak tawhin, tanpuina hrang hrang mi 2,197 hnenah an lo hlan tawh a ni.