Chief Minister Lalduhoma chuan Nilaini khan CM Conference Hall-ah Administrative Training Institute (ATI)-a foundation training nei mek Mizoram Secretariat Service (MSS) officer-te a kawm a, sorkar file kalpuina leh thutlukna siam kawnga officer pawimawh tak an nih angin sorkar dan leh inkaihhruainate chiang taka hria a, hmathlir fel tak nen ram leh mipuite tana hma la turin a fuih.
Chief minister chuan MSS officer-te chu sorkar flagship scheme-te ngaipawimawh tura chahin, khawvel inthlak chak zelah thil thar tha zawk ngaihtuah chhuak thiam officer ram hian a mamawh thu a sawi a. Service hrang hrang inkarah inerna awm thin chu tha a tih loh thu sawiin, sorkar pakhat hnuaia ram tana thawkho vek an nih avangin sorkarin tul a tih angin hnathawktute a siksawi thei tur a ni tih a sawi bawk.
Office hun vawn dik a pawimawh thu sawiin, tlai taka kal a tlai taka bang lovin hunbi pangngaiah hna zo mai thin tur leh mahni chhungkua pawh tha taka vil turin a chah bawk.
He hunah hian trainee officer-ten an duh apiang zawhna chief minister an zawt a ni.