Mauricio Pochettino-a chuan Manchester United head coach thar ni turin an hna zawrk a pawm thei dawn ta.
United hian Argentine hi darkar 48 lo awm leh tur chhunga a hna atanga an chawlhtir tur, Michael Carrick-a thlaktu atan an dawr tawh a ni.
Carrick-a hma hun hi tihchian a nih veleh USA manager Pochettino-a hian a aiawh zui hi a duh niin BBC chuan a tar lang.
Tottenham leh Chelsea boss hlui hi US Soccer Federation chu a zah em em chungin United-in official-a an dawr hun a nghak mek a ni.
Red Devils hian Pochettino-a la chhuak tur hian $ maktaduai 10 an pek a ngai dawn a, August khan a contract thar a lo ziak chauh a ni.
USA hian kar tharah Concacaf Nations League quarter-final-ah Haiti chu vawi hnih khelh an hmabak mek bawk.
Hetiang boruak karah hian Old Trafford club chuan an dawr dawn tho a nih hmel a, kum 54 mi, Pochettino-a hian a team enkawl lai a camp-pui mekna atangin a inpu chhuak dawn a nih hmel.
United hian Argentina defender hlui hi a hma pawhin vawi thum an lo dawr tawh a. Kum 2018-a Jose Mourinho-a an bân tum khan a vawi khat nan an dawr tawh a. a hnuah kum 2022-a Erik ten Hag-a an lak luh dawn leh kum 2024-a Dutchman an bân leh tum khan an dawr leh bawk.
Carrick-a United hma lam hun hi Nilainia Monaco-a chief executive Omar Berrada, director of football Jason Wilcox leh neitu pakhat, Sir Jim Ratcliffe-a te thukhawmin an tichiang dawn a, he chanchin ziah lai hian engmah thuchhuak an la nei lo.
Berrada leh Wilcox-a te hi Monaco-a kal fo thin an ni a, tun tumah erawh chuan football club kalphung leh hma lam hun sawi tur bikin an kal a ni.
An sawiho tur lian ber chu Carrick-a hma hun leh tu nge a dawtah awm ang tih a ni.
Berrada leh Wilcox hian an head coach hi chhuak tura an tih ngei rin sa a ni bawk.
Kum 45 mi, Carrick-a hian Nilaini tuk khan Carrington training chu pangngai takin a la kal tho bawk.
United hi Premier League-ah tlahniam thei dinhmun, 18-naah awmin vawi 10 khelh tawhah vawi khat chiah chak an la nei a, August hnu lamah chak an la nei lo.
1986-87 season hnua khelh 10-a an hniam ber tum niin hemi kum hian 20-na an ni.
Boss thar atana sawi rik, Pochettino-a hian Premier League-ah sulhnu nei nual tawhin January, 2013 khan Southampton a enkawl tan a. Kum 2014 atang khan kum nga chhung Tottenham enkawl zuiin Champions League final hial a thlenpui thei.
Paris St-Germain-ah insawnin January, 2021 leh July, 2022 inkar a awm a, 2023-24 season khan Chelsea a enkawl leh bawk.
Ram enkawl lamah kal zuiin USA hi September, 2024 atangin a hruai a, 2026 World Cup-ah khan round of 16 a thlenpui.