Aston Villa manager Unai Emery-a’n hmun danga kal lovin contract thar ziaka a club enkawl lai enkawl chhunzawm a thlang a. Jamie Carragher chuan Manchester United a zawm lo tur chu lawmawm a tih thu a sawi.
Emery-a hi Manchester United nen an sawi zawm tawh thin a, Carragher-a chuan Spanish coach fing tak hian club lian zawk a pan a rin thu a lo sawi tawh a, kha vang khan sawi chhiat a hlawh phah hle a ni.
Aston Villa pawh Carragher-a thil sawi avang hian an thinrim hle a, ngaihdam a dil loh chuan dan anga hma lak thlengin an vau hial a ni.
Amaherawhchu, Carragher-a hian ngaihdam a dil a, chu mi hnuah a thil sawi hnu hi a ziak nawn leh ta tho a ni.
Football pundit Carragher-a hian tun dinhmunah Aston Villa chu zawm chakawm zawk emaw, tha zawk emaw pawh ni mah se Manchester United chu Villa aiin an lian zawk tih phat rual a ni lo tiin a sawi.
“Emery hian club lian zawk pan se tih ka sawi ngai lo. Eng vangin nge Emery hi Manchester United zawm turin ka duh ngawt ang? A zawm chuan an tha lehzual sawt dawn asin,” tiin Carragher chuan a sawi.
“Contract thar a ziak tur chu Aston Villa leh Premier League tan a tha hle a, a lungawizia leh a awmna hmuna a nghehzia a lang chiang hle a ni. Amaherawhchu, league title leh Champions League beisei ngai lo club ho zinga lungawi thiam tak tia an sawi thin hian ngaihtuahna a tithui viau a ni,” a ti bawk.
“United hi tunah chuan Real Madrid, Bayern Munich leh PSG te dinhmunah an ding pha rih lo. Amaherawhchu, coach tu pawh Old Trafford-a an luh hian an hun chhungin heng Europe club lian ho hmachhawn thei tura team siam chhuah chu an laka thil beisei a ni reng tawh dawn a ni. Chutiang nih phak loh chu tlawmna leh hlawhchhamna a ni reng ang. Aston Villa erawh chutiang an ni ve lo a, Europe khawmualpuia club lian huanga sawi tel chi an la ni ve lo hrim hrim a ni,” tiin Carragher chuan a sawi.