BJP-in dy. CM nei dawn lo ti

Aizawl: BJP Mizoram State President, Siaha bialtu MLA Dr K Beichhua chuan Mizoram politics-a BJP-in deputy chief minister an nei dawn tia thuthang awm thin chu thu belhchian dawl lo mai a nih thu sawiin, “Tun dinhmunah thawhpui tur political party tumah kan la sawm lo,” a ti.

Thawhtannia BJP Mizoram State Office ‘Mipui Rûn’-a kar thar inhlanna leh political session neihah thu sawiin Dr. K. Beichhua chuan, “Tun dinhmunah thawhpui tur political party tumah kan la sawm lo va, central hruaitute pawhin thurawn engmah min la pe lo,” a ti.

Central hruaituten Mizoram an ngaihven thu leh Mizoram Prabhari atan pawh term hmasaa union minister hial dah a nih thu sawiin, hmasawnna bo ta lak let leh chu an tum ber a nih thu a sawi bawk.

Prime Minister Narendra Modi kaihhruai central BJP sorkar chuan kalphung tha leh eirukna awm theih lohna system a siam avangin state dangte pawh hmasawnna kawngah an sang chak hle tih a sawi a. Tun hma kum thum chhung khan ZPM sorkar kal dan ngawi renga an lo thlir tawh thu leh tun atang chuan ram veina avangin sorkar thil tihdik lohte dodal a, eptu nihna dik tak chelek ve tawh turin party mipuite a chah bawk.

Leave a Reply

error: Content is protected !!