Aizawl: Ni hnih chhung awh tur 32nd National Children’s Science Congress State Level chu Nilaini chawhma dar 10 khan Science Centre Auditorium, Berawtlangah School Education Director Angela Zothanpuii chuan a hawng a, district hrang hrang atanga kalkhawm child scientist-te thil zir bing project 44 hmangin an intihsiak mek a ni.
Hawnna inkhawmah hian khuallian Angela Zothanpuii chuan child scientist-te chu taima tak leh nasa lehzuala lehkha zir turin a fuih a, India ram pum huapa lang phak khawpa zirna kawngah tan lak a tul thu a sawi a. Kum 1993 atanga neih tan Children’s Science Congress bahlah awm lova buatsaih thin a ni chu lawmawm a tih thu sawiin, Science Teachers Association Mizoram (STAM) hruaitute inpeknaah lawmthu a sawi bawk.
He hun hmang tur hian child scientist-te chu Science Centre-ah hands-on activities neihpui an nih bakah, RIPANS leh Pachhunga University College Science Laboratory-te tlawhpui an ni.
Children’s Science Congress kharna inkhawm hi vawiin chawhnu dar 3-ah neih a ni dawn a, Chief Minister Adviser (Bana Kaih) Dr. KC Lalmalsawmzauva chu khuallian niin a hmanpui ang.